මම බිස්නස් එකක් පටන් ගන්නවට ගෙදර අය කැමති නැහැ... මම මොකද කරන්නේ?
ව්‍යාපාර දියුණු කර ගැනීම ගැන මගෙන් විමසීම් කරන අය අතරේ "මට ව්‍යාපාරයක් පටන් ගන්න ඕනේ, ඒත් වයිෆ් කැමති නෑ... අම්මා කැමති නෑ... තාත්තා කැමති නෑ..." වගේ දේවල් කියන කිහිප දෙනෙක් අනිවාර්යයෙන්ම ඉන්නවා.
මේ ලිපිය ඒ අය වෙනුවෙන්. මේ වගේ ප්‍රශ්න කළමනාකරණය කරගැනීම වෙනුවෙන් ඔයා වැඩ කරන්න ඕනේ කොහොමද කියන දේ තමයි මේ ලිපියෙන් කියලා දෙන්න යන්නේ.
ඔයාගේ හීනයට ලෝකේ ඉන්න සමීපතම මිනිස්සු අකමැති වෙන එක ලොකු පීඩනයක් තමයි. හැබැයි මතක තබා ගන්න, ගෙදර අය බිස්නස් එකට අකමැති වෙන්නේ ඔයාට තියෙන වෛරයකට නෙමෙයි, ඔයා ගැන තියෙන ආදරය සහ "බය" නිසයි. ඒ නිසා මේ වගේ ප්‍රශ්නවලදී කලබල නොවී, බුද්ධිමත්ව වැඩ කරන්න ඕනේ.
ඒ නිසා එවැනි අවස්ථාවකදී පහත කරුණු ගැන සැලකිලිමත් වෙන්න.
1. ඔවුන්ගේ අකමැත්ත පිටුපස තියෙන "බය" තේරුම් ගන්න.
ගෙදර අය බිස්නස්වලට අකමැති වෙන්නේ බොහෝ විට කරුණු තුනක් නිසයි: මුදල් අහිමි වෙයි කියන බය, රැකියාවේ ස්ථාවරත්වය නැති වෙයි කියන බය සහ සමාජයෙන් එන විවේචන. ඔවුන්ට ඕනේ ඔයා සුරක්ෂිතව ඉන්නවා දකින්නයි.
ඒ නිසා මුලින්ම ඒ බය තේරුම් ගන්න. ඔවුන්ගේ පැත්තෙන් හිතලා බලන්න. එතකොට ඔයාට ඔවුන්ව තේරෙන්න පටන් ගන්නවා. ඔවුන්ගේ සිතුවිලි තේරෙන්න පටන් ගන්නවා. මේ ප්‍රශ්නය ඔයාට ඕනේ විදිහට විසඳා ගන්න නම්, ඒ තේරුම් ගැනීම ඔයාට ඉතාම වැදගත්.
ඒ නිසා තර්ක කරන්න යන්න එපා. ඔවුන්ට කතා කරන්න දෙන්න. ඇයි අකමැති කියන දේ ඔවුන්ගෙන් ප්‍රශ්න කරන්න. පුළුවන් තරම් ඔවුන්ගේ හිතේ තියෙන දේවල් එළියට ගන්න.
2. තර්ක කරන එක නතර කරලා "ප්‍රතිඵල" පෙන්වන්න.
ඔයා "මම බිස්නස් එකක් කරනවාමයි" කියලා දහස් වතාවක් කිව්වත්, ගෙදර අය ඒක එකපාරටම විශ්වාස කරන්නේ නැහැ. මොකද ඔවුන් දකින්නේ ඔයාගේ වචන විතරයි.
ඒ වෙනුවට ඔයාට පුළුවන් පුංචියට වැඩේ පටන් අරන්, ඒකෙන් ලැබෙන පුංචිම හෝ සාර්ථකත්වයක් ඔවුන්ට පෙන්වන්න. වචනවලට වඩා ප්‍රතිඵල බලවත්. ඔයා බිස්නස් එකෙන් ලැබුණු පළමු ලාභය ඔවුන්ගේ අතට දීලා බලන්න. එදාට ඔවුන්ගේ අකමැත්තෙන් භාගයක්ම නැති වෙලා යාවි. ඔවුන්ට ඕනේ ඔයා "දිනනවා" දකින්නයි.
3. "Side Hustle" එකක් විදිහට පටන් ගන්න.
මේ වගේ ගැටලුවලදී බොහෝ විට ගෙදර අයට පීඩනයක් එල්ල කරන ලොකුම බය තමයි, ඔයා රැකියාව කරන එක නතර කරලා බිස්නස් එකට බැහැලා අනාථ වෙයි කියන එක.
ඒ නිසා ඔයා රැකියාවක් කරන කෙනෙක් නම්, රැකියාවෙන් අයින් වෙන්න කලබල වෙන්න එපා. රැකියාව කරන ගමන් ලැබෙන විවේක වෙලාවලදී බිස්නස් එක කරගෙන යන්න. ඔයා මේ දෙකම සමබරව (Balance) කරනවා දකිනකොට ඔවුන්ට ඔයා ගැන තියෙන විශ්වාසය වැඩි වෙනවා. ඔවුන්ට දැනෙනවා ඔයා මේ දේ කරන්නේ අවදානමක් අරගෙන නෙමෙයි, සැලසුමකට අනුවයි කියලා.
4. ඔවුන්ට ඔයාගේ "Risk Management Plan" එක පැහැදිලි කරන්න.
නිකම්ම "මම බිස්නස් එකක් කරනවා" කියනවාට වඩා, ඔයා කොහොමද ඒක කරන්නේ, වියදම් හොයාගන්නේ කොහොමද, පාඩුවක් වුණොත් කරන්නේ මොකක්ද කියලා පැහැදිලි සැලැස්මක් ඔවුන්ට පෙන්වන්න.
ඔයා "Backup Plan" එකක් ගැන හිතලා තියෙනවා කියලා පෙනෙනකොට, ඔවුන්ට දැනෙන බය අඩු වෙනවා. ඔයා මේක කරන්නේ තාවකාලික ආසාවකට නෙමෙයි, වගකීමකින් කියන එක ඔවුන්ට දැනෙන්න දෙන්න.
5. ඔවුන්ව බිස්නස් එකේ කොටස්කරුවන් කරගන්න.
සමහර වෙලාවට ගෙදර අයට බිස්නස් එක ගැන අදහසක් නැති නිසා ඔවුන් ඒක ප්‍රතික්ෂේප කරනවා. ඒ වෙනුවට ඔවුන්ට පුංචි පුංචි උදව් කරන්න ඉඩ දෙන්න. බිස්නස් එකේ නම තෝරන්න ඔවුන්ගෙන් අහන්න. නැත්නම් ඇසුරුම් කරන (Packing) වැඩකට උදව් කරගන්න.
ඔවුන් ඒකට සම්බන්ධ වෙනකොට ඒක ඔවුන්ගේත් හීනයක් බවට පත් වෙනවා. එතකොට ඔවුන් අකමැති වෙන එක නතර කරලා ඔයාට හයියක් වෙන්න පටන් ගනීවි.
6. ඉවසීමෙන් ඔබේ "කැපවීම" ඔප්පු කරන්න.
ගෙදර අය එක දවසින් වෙනස් වෙන්නේ නැහැ. ඒකට කාලය යයි. රණ්ඩු වෙලා, තරහ වෙලා ගෙදර පරිසරය අවුල් කරගන්න එපා.
ඒ වෙනුවට ඔයා කොච්චර මහන්සි වෙනවාද, ඔයා මේ වෙනුවෙන් කොච්චර කැප කිරීම් කරනවාද කියන එක ඔවුන්ට නිහඬව පෙන්වන්න. ඔයාගේ උත්සාහය එක දිගටම දකිනකොට ඕනෑම හිතක් මෘදු වෙනවා.
ගෙදර අයගේ අකමැත්ත කියන්නේ ඔයාගේ ගමනට තියෙන "තාප්පයක්" (Wall) නෙමෙයි. ඒක ඔයාට තියෙන "ආරක්ෂක දැලක්" (Safety Net) විතරයි.
ඔවුන්ට ආදරයෙන් කතා කරන්න. ප්‍රතිඵලවලින් පිළිතුරු දෙන්න. ඔයා සාර්ථක වෙන දවසට ඔයාට වඩාත්ම සතුටු වෙන්නෙත් අද ඔයාගේ ගමනට අකමැති වෙන ගෙදර අයම තමයි.
සටහන : 𝗖𝗵𝗮𝘁𝗵𝘂𝘀𝗸𝗮 𝗔𝗺𝗮𝗿𝗮𝘀𝗲𝗸𝗮𝗿𝗮
(𝑩𝒖𝒔𝒊𝒏𝒆𝒔𝒔 & 𝑷𝒓𝒐𝒅𝒖𝒄𝒕𝒊𝒗𝒊𝒕𝒚 𝑫𝒆𝒗𝒆𝒍𝒐𝒑𝒎𝒆𝒏𝒕 𝑨𝒅𝒗𝒊𝒔𝒐𝒓)
Comments